|

Индонез улс шинэ нийслэл байгуулахдаа Арабын ханхүү, Японы тэрбумтан, Британийн ерөнхий сайд аснаар зөвлүүлнэ

Индонез улс нийслэлээ шинэ газарт нүүлгэх $34 тэрбумын өртөгтэй төсөл эхлүүлэх гэж байгаа. Одоогийн нийслэл Жакарта нь хэт томорч, бохирдол нь дийлдэхгүй болж, хөрс нь далайн усанд идэгдэн суух болсон тул  Борнео арлын зүүн Калимантан мужийн хүн ам цөөтэй газарт шинэ нийслэл байгуулах болсноо Индонезийн ерөнхийлөгч Жоко Видодо өнгөрсөн оны наймдугаар сард зарлаж байв.

Нийслэл нүүлгэх зардлын 19 хувийг Индонезийн засгийн газар гаргах бол үлдсэн хэсгийг төрийн болон хувийн хэвшлийн компани, аж ахуйн нэгжүүд, хөрөнгө оруулагчид гаргах ажээ.

Тэгвэл шинэ нийслэл бүтээн байгуулах төслийг удирдах хороо байгуулагдаж, хороог Арабын Нэгдсэн Эмират Улсын нийслэл Абу Дабигийн захирагч, угсаа залгамжлах ханхүү Шэйх Мохаммед Бин Зайд Аль Нахьян даргалахаар болсныг Индонезийн засгийн газар өчигдөр зарласан байна.

Ханхүү дэлхийн хамгийн том исламын шашинт улсын бүтээн байгуулалтад чухал үүрэг гүйцэтгэх болсноо нэр төрийн хэрэг гэж мэдэгджээ.

Шинэ нийслэл байгуулах хороонд мөн Японы хамгийн баян хүн, Софтбанк компанийн гүйцэтгэх захирал Масаёши Сон гишүүнээр ажиллах болсон байна.

Бас Их Британийн ерөнхий сайд асан Тони Блэйр хороонд орж ажиллахаар уригджээ. Дээрх алдартнуудыг урьж оролцуулснаар гадаадын хөрөнгө оруулагчдын итгэлийг олж авч чадна гэж Индонезийн тал тооцоолсон байна.

Индонезийн ерөнхийлөгч Жоко Видодо саяхан Абу Дабид зочлоод ирэхдээ ханхүү Аль Нахьянтай хамтарч ажиллахаар тохиролцжээ. Жакарта хот нь 10 сая оршин суугчтай, ойр хавийн дагуул хотуудыг нь нийлүүлбэл 30 сая оршин суугчтай Азийн мега хотуудын нэг юм. Энэ хот газар хөдлөлт, үер усанд байнга өртөж, хөрс нь далайд аажмаар живж байгаа.

Хотын түгжрэл, хүн амын хэт ачаалал нь жил бүр $6.5 тэрбумын зардал үүсгэдэг гэдэг. Харин шинэ нийслэл байгуулагдах зүүн Калимантан муж нь нэг үе битүү ширэнгэ ой байсан, одоо 3.5 сая хүн амьдардаг нутаг юм.

270 сая хүнтэй Индонез улс нь хүн амын тоогоор дэлхийд дөрөвдүгээрт бичигддэг. 17,000 гаруй арлаас бүрддэг энэ улсын хүн амын 54 хувь нь нийслэл Жакарта хотын оршдог Ява аралд суудаг ажээ.

Э.Сэмүүн 

Эх сурвалж: Associated Press

* /заавал/
Bold Italic Underline Strike | Align left Center Align right | Insert smilies Select color | Add Hidden Text Insert Quote Convert selected text from selection to Cyrillic (Russian) alphabet Insert spoiler
Код: *
Click on the image to refresh the code if it cannot be viewed
өөр код авах бол зураг дээр дарна уу