|

Сонгуульд оролцоогүй бол Австралийн иргэнийг 15 доллароор торгодог

 Австралийн Сонгуулийн комиссоос 7 дугаар сарын 2-нд болох парламентын сонгуульд оролцохоор бүртгүүлэх хугацаа орон нутгийн цагаар өнөөдөр 20:00 цагт дуусгавар болно гэдгийг иргэдэд хандан анхаарууллаа.

Гэтэл одоог хүртэл тус улсын 950 мянган иргэн бүртгүүлээгүй байна. Сонгуульд оролцон саналаа өгөх нь австраличуудын хувьд зөвхөн эрх нь төдийгүй заавал биелүүлэх ёстой үүрэг нь байдаг аж. Австралид иргэний үнэмлэх гэж байдаггүй учраас сонгогч нь өөрийн хаягийн мэдээллийг өгч, жолооны үнэмлэх эсвэл гадаад паспортын дугаараар сонгогчдын нэрсийн жагсаалтад бүртгүүлдэг байна. Үүний тулд сонгуулийн хэсгийн хороонд өөрийн биеэр ирэх эсвэл интернэтээр бүртгүүлж болдог аж.

Тухайн иргэн сонгуульд оролцож санал өгөхөөс татгалзсан тохиолдолд түүнийг 20 австрали доллароор /15 ам. доллар/ торгодог байна. Торгуулийн хуудсыг иргэдэд шуудангаар илгээдэг ба тухайн хүн торгуулийг төлөхөөс татгалзах эсвэл сонгуульд оролцоход нь саад болсон хүндэтгэх шалтгаануудаа тайлбарлаагүй бол хэргийг шүүхэд шилжүүлнэ. Шүүхээс тухайн иргэний буруутай нь нотлогдсон тохиолдолд 170 доллароор торгохоос гадна шүүх ажиллагааны зардлыг гаргуулдаг ажээ.

Өнөөдрийн байдлаар Австрали улсын хүн амын тоо 24,1 саяд хүрээд байна.