|

Дарханаас 35 иргэн НӨАТ-ын буцаан олголттой худалдааны хонжворын эзэд болжээ

Уг хуульд иргэдэд худалдан авсан бараа үйлчилгээнд төлж буй НӨАТ-ынхаа 20 хүртэлх хувийг буцаан авах мөн сугалаанд оролцох боломжийг бүрдүүлээд байгаа юм.

НӨАТ-ын буцаан олголттой худалдаа хийсэн иргэн бүр 14 хоногт нэг удаа болох сугалаанд оролцох эрхтэй, сугалааны нийт хонжворын сан нь хоёр тэрбум төгрөг байгаа. Эхний сугалаа энэ сарын 17-нд орон даяар явагдаж Дархан-Уул аймгаас нийт 35 хүн 20-500.000 төгрөгийг хожсон байна.

Өнөөдрийн байдлаар Дархан-уул аймгийн хэмжээнд 420 гаруй цэг буюу кассын машин Татварын ерөнхий газрын нэгдсэн системтэй холбогдон ажиллаж байна. Энэ тоо цаашид өсөн нэмэгдэнэ. Учир нь Дархан-Уул аймагт 2224 ААН идэвхитэй үйл ажиллагаа явуулж байна. Тэдгээрийн 70 орчим хувийг 1 дүгээр улиралд багтааж кассын машинтай болгох зорилготой ажиллаж байгаа гэж аймгийн Татварын хэлтсийн даргаЖ.Баттулга ярьлаа.

Аймгийн Татварын хэлтэс нь НӨАТ-ын хуулийн өөрчлөлт, НӨАТ-ын урамшууллын системийг сурталчилах ажлыг байнга зохион байгуулж байгаа ба өнгөрөгч долоо хоногт 201 татвар төлөгчийг хамруулсан байна.

НӨАТ-ын хуулийг амжилттай хэрэгжүүлэхэд иргэдийн оролцоо чухал байна. Иргэн бүр худалдаа, үйлчилгээний газруудад кассын машинтай бол, нэгдсэн системд холбогд зэрэг шаардлагыг тавихын зэрэгцээ худалдан авалт хийсэн баримтаа www.ebarimt.mn хаягт бүртгүүлж байхыг албаны хүмүүс онцолж байна.
Эх сурвалж: darkhan.gov.mn