Монгол Улсын Засгийн газарт тэнэсэн сум шиг ирээд зоогдчихсон зарим нэг сайд "даахгүй нохой булуу хураана” гэгчээр "том том” ярихаас хэтрэхгүй сууна.

Тодруулбал, Зам тээврийн хөгжлийн сайд Л.Халтар саяхан "Зүүнбаян-Тавантолгой, Тавантолгой-Гашуунсухайт чиглэлийн төмөр зам ирэх 2022 онд ашиглалтад орно. Мөн зүүн босоо чиглэлийн 237 км төмөр замаас гадна зүүн бүсэд Чойбалсангаас Хөөт, Бичигт гэсэн шинэ төмөр замтай болох юм. Энэ төмөр замыг шинээр барьснаар төмөр зам дагуух уул уурхайн ордууд эдийн засгийн эргэлтэд орж, түүнийг дагасан суурьшлын томоохон бүсүүд бий болно гэж үзэж байна. Хамгийн чухал нь энэ төмөр зам ашиглалтад орсны дараа Забайкалск Манжуур чиглэлийн төмөр замтай өрсөлдөх хэмжээний төмөр замтай болно” гэж ярьсан.

Түүний хувьд ч ёстой л сэрэхгүй бол сайхан ЗҮҮД.

Гэхдээ тэрхүү төмөр зам Л.Халтарыг салбарын сайд байгаа нөхцөлд лав эхлэхгүй гэдэг нь тодорхой. Мань сайдаас ганц хүсэх зүйл нь ердөө л Дарханы замыг дардан болгож өгөх. Анх хуулалтын ажил нь хийгдэх үед  тэрбээр дэд сайд  байсан.

Анх сайдын ажил авахад нь ч өмнө нь дэд сайд байсан учраас бүх асуудлыг нь мэднэ. Тиймээс энэ замын ажлыг яаравчлуул гэдэг үүрэг, чиглэлийг УИХ болон Засгийн газраас өгч байсан. Гэтэл өнөөг хүртэл дуусгасан ч үгүй бахь байдгаараа иргэд эрүүл мэнд, эдийн засгаараа хохирсоор байна. Улс ч ялгаагүй, евро, азийг холбох транзит тээвэрлэлт хийнэ гэх хоосон мөрөөдөлтэйгээ гацчихсан.

Тэгсэн мань сайд Л.Халтар дараагийн төмөр замын ажлын талаар "том” дуугарч яваа нь хэтэрхий эмгэнэлтэй биш гэж үү.

Яах вэ, Зам тээврийн ХӨГЖЛИЙН сайд гэдэг "сэтэртэй” болохоор алсын хараатай, холын цараатай "мөрөөдөж” байх шиг байгаа юм.

Гэвч эрхэм сайдтан энд, тэнд очиж том дуугарч байхынхаа оронд Дарханы замыг дардан болгоод нэг ч болов эхлүүлсэн ажлаа дуусгаж өгөөч, монголчуудад.

Хүрз, жоотуу бариад өөрөө очих шаардлагагүй. Хийх ёстой менежментийг нь л зөв зохион байгуулаад хот, хөдөөг сайхан холбоод өгчих ёстой биш гэж үү, Л.Халтар сайд аа.