Иргэдийн төлөөлөл болох аймгийн Ахмадын зөвлөх багийнхан энэ сарын 3-ны өдөр "Гэрэлт гудамж” байгуулах ажлын явцтай танилцаж, хяналт тавилаа.

Үйлчилгээний төв-Эрдэнэс плазагаас Номингийн уулзвар хүртэлх авто зам дагуу Дархан хотын "Гэрэлт гудамж”-ийг ногоон байгууламжийн хамтаар байгуулж байгаа юм.

Гүйцэтгэгч байгууллага болох "Некст стандарт” ХХК-иас "Бүтээн байгуулалтын гүйцэтгэл 85 хувьтай явагдаж байна. Тус ажил 8 дугаар сарын 20-ны өдөр бүрэн дуусана" гэсэн мэдээллийг өгч байгаа аж.

Дархан хотод "Гэрэлт гудамж” бий болсноор хотын өнгө үзэмж нэмэгдэхээс гадна зуны улиралд иргэд амарч тухлах аятай нөхцөлийг бүрдүүлэх юм. "Гэрэлт гудамж” төслийн хүрээнд хийгдсэн ногоон байгууламж, зүлэгжүүлэлтэд иргэд сайшаалтай хандаж байгаа юм.

Р.Хишигжаргал